 |
| كيف تكون شخصية جذابة ؟ |
في سلسلة تجارب نفسية خفيفة كدا على نيتفليكس أسمها "100 Humans" .. في أول حلقة كانوا بيدرسوا ايه اللي بيخلي الناس تحكم على أى شخص إنه "جذاب" !!
كان في عوامل كتير بتفاوت تأثيرها زى ان الشخص دمه خفيف، بيعرف يرقص، ملامح شكله، وظيفته، مركزه، ملابسه، ويكون شكله مألوف وقريب منك !!
الصراحة المشكلة كلها في اللي جاي .. ان حكمنا على شخص بإنه جذاب لمجرد شوية حاجات سطحية جدا زى الوسامة مثلا، بتخلي مخنا يبدأ يفترض ان الشخص ده أكيد مثالي في باقي جوانب الحياة .. فأكيد شاطر في شغله .. أكيد طيب وبيعمل خير، وهكذا !!
الإفتراض الخاطئ ده (اللي غالبا مخك بيتبناه غصب عنك) بيأثر جدا على ارائك وأحكامك .. فتلاقي نفسك بتتعاطف مع شخص "مذنب" وبتتساهل معاه لمجرد انه جذاب، مع انك هتكون غليظ جدا في المعاملة مع شخص عمل نفس الذنب لمجرد انه مش جذاب .. وفي الحلقة عملوا مقارنة بين شخص وسيم وشخص اقل وسامة عملوا نفس الجريمة بالحرف في نفس الظروف وهى هى نفس القصة وشافوا رأى الناس في العقوبة .. علشان يكتشفوا ان متوسط الحكم من الجماهير ع الوسيم يكون أقل بحوالي ١٥ سنة سجن من الشخص التاني .. والتعاطف اللا إرادي ده كان في جريمة قتل طفل !!!
لو فكرنا في الموضوع مش هنلاقيه صادم خاااالص وغالبا كلنا عاصرناه وبنشوفه يوميا .. اللاعب ولا الممثل او الممثلة او النجوم اللي متحرش ع النت واللي عليه قضايا نسب واللي عليهم فضايح جنسية و و و و .. كل ده بيتقابل بتعاطف وصعبانيات علشان الناس دي عندهم من عوامل الجاذبية، سواء وسامة، شهرة، معروفين بالنسبة لنا او غيره .. ولكن شوف الهجوم الفظيع والاحكام القوية على نفس الأعمال المشينة/جرائم لو على فئة اجتماعية أبسط او افقر او أقل وسامة وشهرة !!
العقل البشري عظيم بكل ما تعنيه الكلمة من معنى .. ولكني دايما مقتنع ان الحل الأول لأى مشكلة، هو فهم ومعرفة ان في مشكلة اصلا
تعليقات
إرسال تعليق